Þá er þriðja árgangsmóti okkar Fabulous '76 lokið og ekki laust við að maður sé þegar farinn að hlakka til þess næsta, þrátt fyrir eilitla timburmenn. En eftir einn ískaldan Carlsberg og hressilega þynnkuskitu er maður að verða eins og nýsleginn túskildingur.
Mótið þótti takast í alla staði ákaflega vel og viljum við strákarnir í nefndinni nota tækifærið hér og þakka Gerði sérstaklega vel og innilega fyrir allt í sambandi við undirbúning mótsins en eins og kannski flesta grunar var hún potturinn og pannan í þessu öllu saman. Einnig viljum við þakka Guðrúnu Rósu fyrir sína fórnfúsu aðstoð. Eins viljum við hrósa kokkunum fyrir frábæran mat en það sást til fólks vera að gæða sér að veitingunum langt fram á nótt.
Þrátt fyrir gríðarlegt fjör hefði verið enn meira gaman að sjá fleiri og fyrir næsta mót má fólk alveg vera duglegra að hringja í hvort annað í sínum bekkjum eða gömlu vinahópum til að byggja upp stemningu. Sérstök mætingaverðlaun að þessu sinni fær GÞ bekkurinn úr Brekkó með 14 en fast á hæla þeirra kom RE bekkurinn, einnig úr Brekkó, með 13 en tveir forfölluðust þar á síðustu stundu vegna veikinda, Steinsmuguskitu nánar tiltekið, sem kostuðu RE sigurinn. Aðrir bekkir þurfa að girða í brók.
Nú Grundverjar voru hins vegar vel girtir í knattspyrnuleiknum og stóðu sig með mikilli prýði en þeir unnu í æsispennandi og hnífjöfnum leik, 10-8, þar sem Jón Frímann markakóngur fór mikinn í sókninni. Að vísu fékk Brekkó Frímanninn lánaðan í seinni hálfleik en það dugði ekki til þrátt fyrir 4 mörk frá honum. Mark leiksins skoraði Gunnar Örvar með glæsilegri bakfallsspyrnu sem var þó ekki alveg bakfallsspyrna en samt mjög flott miðað við fólk á okkar aldri. Sparksérfræðingar höfðu reyndar fyrir leikinn spáð villingunum í Brekkó auðveldum sigri þannig að sigur Grundverja kom talsvert á óvart. Ýmsar góðar ástæður liggja að baki sem verða þó ekki tíundaðar hér. Eins og t.d. sú að Eiki miðjusnillingur mætti of seint því hann ætlaði að mæta of snemma en varð fyrir því óhappi að kyrrstæður bíll kastaðist einhvern veginn aftan á hans bíl. Hann náði því ekki að setja mark sitt á leikinn. En allavega... Brekkóbomburnar munu mæta trylltar til leiks næst til að reyna að ná bikarnum til baka en fráfarandi nefnd leggur til að keppt verði frekar í badminton þá. Skoðum það eftir 5 ár.
Báðir skólar stóðu sig frábærlega í gleðinni og var tjúttað til klukkan 03:00 undir glymjandi rokkundirspil að hætti Rásar 2. Að sögn DJ Óla diskó hefur hann ekki séð jafn mikla stemningu á dansgólfinu í langa herrans tíð. Einn af hápunktum kvöldsins var einmitt danssýning Þórarins Ólafsonar undir Ace of Spades með Motörhead. Nefndin sat svo ásamt mestu rokkhundunum til klukkan 05:00 þar sem farið var yfir ,,hin ýmsu mál" sem á daga okkar hafa drifið. En förum ekki nánar út í það.
Rokkhundur árgangsins var valinn Silja Ósk Björnsdóttir sem hreinlega neitaði að fara heim fyrr en síðasti bjórinn var búinn.
Ný skemmtinefnd var kjörinn til að sjá um næsta mót en það eru kjarnastúlkurnar og snillingarnir: Finndís, Guðrún Hallfríður, Helga Dís, Rósa Björk og Þura. Hefur þessi nýja nefnd tekið upp vinnuheitið ,,Gærumafían" og megum við eiga von á gríðarlega skemmtilegu móti frá þeim. Þær vita að þær eiga erfitt verk fyrir höndum að reyna að toppa nýliðið mót en ef einhverjar geta það, þá eru það þær.
Þangað til.. Verið hress, ekkert stress og bless bless.. já og gleymdi næstum. Brekkó rúlar muthafokkas!
Kveðja, Strákarnir í nefndinni
Sturri, Gunni og Hlöbbi.